Meiri peningur at kanna tunnil til Suðuroyar

Enn er einki, sum bendir á, at tað jarðfrøðiliga ikki ber til at gera Suðuroyartunnilin.

Men ymist eigur at verða kannað nærri.

Metingar av jarðfrøðini í Skúgvoy vísa, at oyggin liggur eitt sindur øðrvísi í jarðfrøðiligu løgunum enn væntað, og tað má kannast nærri.

Samferðslumálaráðið hevur svarað Fíggjarnevndini um forkanningar í sambandi við Suðuroyartunnilin.

Ein hálv millión krónur er játtað til forkanningar í ár.

Hava mátað havbotn

Landsverk hevur mátað havbotnin á leiðini av Sandi til Skúvoyar, við sunnara part av Skúgvoy og norðanfyri í Suðuroynni.

Kanningarnar verða nú savnaðar og viðgjørdar á Jarðfeingi, sum skal lata Landsverki frágreiðing í ár.

Næsta stig verður at skjóta seismikk og at gera kjarnuboringar. 

Landsverk mælir til, at játtanin verður hækkað upp í tvær milliónir krónur næsta ár.

Nýggja havrannsóknarskipið, sum verður liðugt í 2020, er útgjørt at skjóta seismikk, og Landsverk hevur víst á, at tað kann loysa seg at bíða við hesum kanningunum, til skipið er liðugt.

Verður henda loysnin vald, ber til at halda fram við innleiðandi kanningum næsta ár fyri eina hálva millión krónur.