Loyvi at landa menningarkvotu í Fuglafirði

Katrin Jóhanna landar okkurt um 1.700 tons av svartkjafti til Havsbrún í Fuglafirði.

Svartkjafturin er fiskaður suðuri móti markinum. 

Skipið hevur fingið loyvi at fiska 2.500 tons av svartkjafti.. 

Hetta er menningarkvota, sum reiðaríið, P/f Kinnfelli í Miðvági, hevur fingið.

Felagið hevur skrivligt loyvi frá Fiskimálaráðnum at landa svartkjaftin í Fuglafirði, hóast menningarkvotan í fjør varð latin skipinum og virkinum í Miðvági, sigur Árni K. Dalsgaard, nevndarformaður í Kinnfelli og skipari á Katrinu Jóhonnu. 

Havsbrún er einasta virki í Føroyum, sum tekur móti svartkjafti til íðnað.

Roynist væl

Hetta var fyrsti túrurin hjá Katrinu Jóhonnu, sum er 20 ár og keypt til Miðvágs úr Noregi.

Skipið roynist væl, sigur Árni K. Dalsgaard.

Teir fara út aftur í kvøld.

Manningin er at kalla øll úr Vágum.  

Eitt partafelag, sum eigur skip, og Snarfrost í Miðvági fingu í fjør menningarkvotu, 14.000 tons av uppsjóvarfiski um árið í fýra ár.