Ikki liðugt við Novo Nordisk og diabetismiðstøðina

Málið um Novo Nordisk grunnin og eina diabetismiðstøð í Føroyum er ikki avgreitt í Heilsumálaráðnum enn, verri enn so.

Sirið Stenberg, landsstýriskvinna, svaraði í gjár einum skrivligum fyrispurningi, sum Kaj Leo Holm Johannesen, tingmaður, setti beint fyri jól í fjør. 

Men ikki fyrr enn 1. februar í ár varð samtykt, at fyrispurningurin skal svarast.

Sirið Stenberg sigur tað vera týdningarmikið, at allir politisku flokkarnir, eisini andstøðan, eru við í viðgerðini.

Málið hevur við sær nógvar prinsipiellar og etiskar spurningar, sigur hon. 

Brýtur leistin

Málið kann eisini bróta leistin, sum føroyingar higartil hava skipað heilsuverkið eftir.

Sirið Stenberg sigur, at politiska viðgerðin er byrjað.

Málið hevur verið á landsstýrisfundi. Nú verður tað viðgjørt saman við heilsupolitiska fylgibólkinum. Í honum eru fólk úr øllum flokkum í løgtinginum. 

Tá tann viðgerðin er liðug, verður málið aftur lagt fyri landsstýrisfund.

Sirið Stenberg sigur eisini, at ein almennur stovnur kann ikki átaka sær uppgávur ella skyldur, sum verða fíggjaðar uttanífrá, uttan, at játtandi myndugleikin, og hann er løgtingið, veit hetta.

Tí inntøkur og útreiðslur, sum verða fíggjaðar uttan fyri landskassan, skulu í fíggjarlógina og í játtanarroknskapin.