»Nay«: Støðan meira óviss enn nakrantíð

Bretska undirhúsið vrakaði í gjárkvøldið avtaluna, sum Theresa May, forsætisráðharri, gjørdi við ES, og støðan í Bretlandi er nú meira óviss enn nakrantíð.

242 atkvøður vóru fyri avtaluni og 391 ímóti, so tað verður torført hjá Theresa May, forsætisráðharra, at fáa avtaluna samtykta.

Fer at stríðast fyri avtalu

Theresa May boðaði frá, at hon fer at stríðast fyri at fáa avtaluna samtykta, men hvussu tað skal gerast, veit eingin. Í dag skal Parlamentið gera av, um Bretland skal úr ES, uttan nakra avtalu.

Ger Parlamentið tað, so fer Bretland úr ES 29. mars, uttan nakra avtalu, og handilsavtalan ímillum londini byggir á reglurnar hjá heimshandilsfelagskapinum, WTO.

Heldur Parlamentið ikki, at Bretland skal fara úr ES, uttan eina avtalu, so skal Parlamentið í morgin atkvøða um freistin, at fara úr ES, 29. mars, skal útsetast.

Freistin ikki útsett

Theresa May hevur sagt, at hon er ikki fyri at útseta freistina. Eftir atkvøðugreiðsluna segði Theresa May, at í dag skal Parlamentið atkvøða um bretar skulu fara úr ES uttan eina avtalu.

Hon segði, at hon er fyri at fara úr ES, tí tað gjørdi ein meiriluti av fólkinum av, men hon legði aftrat, at best er, um ein avtala er ímillum partarnar.

Tíðindamaðurin hjá Danmarks Radio í Bretlandi, KIm Bildsøe, sigur seg rokna við, at í atkvøðugreiðsluni í dag, fer Parlamentið at samtykkja, ikki at fara úr ES uttan eina avtalu. Tí er ein møguleiki fyri, at brexit verður útsett til seinast í mai.

Val til ES tingið 23. til 26. mai

Jean-Claude Juncker, formaður í ES tinginum, hevur sagt, at tá mugu bretar vera farnir úr ES, tí teir skulu ikki atkvøða. Eru teir framvegis í ES tá, so má eisini val til Europatingið vera í Bretlandi, sigur ES.

Spurningurin er eisini, hvussu leingi Theresa May heldur til stóra trýstið, men konservativir tinglimir halda ikki, at tíðin er tann rætta at skifta forsætisráðharra.

Andstøðuleiðarin, Jeremy Corbyn, mælti eftir atkvøðugreiðsluna til nýval, men hildið verður ikki, at tað verður úrslitið.