Johnson hittir Merkel og Macron

Hetta er fyrsta vitjanin hjá Boris Johnson, bretska forsætisráðharranum, uttanlands, síðani hann tók við, sum forsætisráðharri í juli.

Tað skrivar bretska blaðið, The Guardian, á sosiala miðlinum, Twitter, sambært tíðindastovuni hjá Ritzau í morgun.

Samráðingar takast uppaftur

Boris Johnson skal hitta franska forsetan, Emmanuel Macron, týsdagin og týska samveldiskanslaran, Angela Merkel, mikudagin. Hann skal eisini hitta Donald Tusk, forseta í Evroparáðnum.

Boris Johnson fer at royna at fáa europeisku leiðararnar at taka uppaftur samráðingarnar um Brexit, so Bretland ikki fer úr Evropeiska samveldinum uttan nakra avtalu.

Týska stjórnin kunngjørdi í gjár, at Angela Merkel, samveldiskanslari, skuldi hitta Boris Johnson skjótt, men eingin dagur var ásettur.

Luttekur eisini á G7-toppfundi

Stjórnarskrivstovan hjá franska forsetanum, Emmanuel Macron, hevur fyribils ongar viðmerkingar til tíðindini hjá blaðnum, The Guardian, um vitjanina.

Boris Johnson fer væntandi eisini at taka lut á G7-toppfundinum við heimsins leiðarum í Biarritz, í útsynningspartinum í Fraklandi, í næstu viku.

Leiðararnir í G7-londunum skiftast um at vera vertir fyri toppfundinum, at kjakast um evni, ið standa hægst á politisku dagsskránni.