Vildi gjalda nógv

Amerikanski forsetin var eftir øllum at døma til reiðar at rinda nógvan pening fyri at keypa Grønland umframt at gjalda heildarveitingina, sum Danmark letur Grønlandi um árið.

Taå skrivar Washington Post, sambært Ritzau. Blaðið endurgevur tvær ónevndar keldur, sum vita nógv um keypsætlanina hjá Donald Trump.

 >> SÍ EISINI Trump vitjar ikki í Danmark kortini

Washington Post skrivar, at USA var til reiðar at rinda Danmark 600 milliónir dollarar um árið, sum svarar til upphæddina, sum Danmark rindar Grønlandi í heildarveiting um árið.

Heildarveitingin úr Danmark til Grønlands næsta ár verður 3,9 milliardir krónur, stendur í uppskotinum til fíggjarlog, sum varð lagt fram herfyri. Heildarveitingin er 55 prosent av øllum inntøkunum hjá grønlendska landskassanum.

Haraftrat var Trump til reiðar at rinda Danmark eitt stórt gjald, sum skuldi rindast eina ferð, aftur fyri Grønland.

– Tankin er púra burturvið

Bæði grønlendski landsstýrisformaðurin, Kim Kielsen, og danski forsætisráðharrin, Mette Frederiksen, hava gjørt greitt, at Danmark er ikki til sølu.

Mette Frederiksen hevur sagt, at tankin um at selja Grønland er púra burturvið.

– Grønland er ikki til sølu. Grønland er ikki danskt. Grønland er grønlendskt. Eg vóni ikki, at hetta var meint í álvara, segði Mette Frederiksen, tá hon var á almennari vitjan í Grønlandi sunnudagin.