Makrelurin horvin í grønlendskum sjógvi

Líkt er til, at makrelurin er horvin í grønlendskum sjógvi. Tað skrivar grønlendska kringvarpið, KNR, á heimasíðuni.

Millum fimm og 13 prosent av makrelstovninum plagdu at koma í grønlendskan sjógv, men í ár er at kalla eingin makrelur at síggja.

Kann hava samband við hitan í sjónum

– Av tí at makrelurin er so nýggjur í grønlendskum sjógvi, er ilt at siga, hví hann er horvin í ár, sigur Teunis Jansen, granskari á grønlendska náttúrustovninum, við KNR.

Men tað kann hava samband við føðina og hitan í sjónum, sigur hann. Makrelurin gýtir vestan fyri bretsku oyggjarnar um várið, og fer síðani norðureftir, millum annað í grønlendskan sjógv, eftir æti.

Makrelfiskiskapurin hevur fingið stóran týdning í Grønlandi. Mesti fiskiskapurin var í 2014. Tá vórðu fiskað 78.000 tons av makreli av grønlendskum sjógvi, og 23 prosent av øllum útflutningsvirðinum hetta árið vóru makrelur.