Misálit á Boris Johnson

Eitt misálit kann verða reist ímóti Boris Johnson í næstu viku. Tað sigur Stewart Hosie, bretskur parlamentslimur fyri Skotska tjóðskaparflokkin, við bretskar miðlar.

Enn er ikki greitt nær tað verður reist, men bæði mánadagur og týsdagur hava verið nevndir. Stewart Hosie sigur, at tað kann vísa seg at verða einasti máti, at sleppa undan ES úrliman, uttan at skilnaðarsemjan er fingin í lag.

Stewart Hosie, sigur, at alt fleiri politikkara bera ótta fyri, at Boris Johnson fer at finna ein máta, at sleppa uttanum lógina, sum krevur, at parlamentið skal samtykkja kósina hjá stjórnini í Brexit-málinum.

Corbyn sinnaður at stjórna eini minnilutastjórn

Leiðarin í Skotska Tjóðskaparflokkinum, Nicola Sturgeon, sigur um sama mál, at verður eitt misálit samtykt, so kann andstøðuleiðarin, Jeremy Corbyn, stjórna eini fyribils stjórn.

Tað er tó ósannlíkt, at tað verður so, tí Liberalu Demokratarnir, sum eisini sita í andstøðu, taka ikki undir við tí. Sjálvur sigur Jeremy Corbyn seg verða sinnaðan at stjórna eini minnilutastjórn.

Leiðarin í Liberalu Demokratunum, Jo Swinson, sigur við BBC, at Jeremy Corbyn er ikki nóg savnandi og at neyðugt er at finna ein politikkara, sum flestu kunnu liva við.