Føroysk gransking fær nú 28 milliónir krónur

<p>Klokkan 13 seinnapartin fer Sjúkrakassagrunnur Føroya at skriva undir avhendingaravtalu við Granskingargrunnin undir Granskingarráðnum.</p>

<p>Granskingargrunnurin fær 28 milliónir krónur, ið er fæið í Sjúkrakassagrunninum. Talan er um reiðan pening og bygningin hjá Sjúkrakassanum í Havn.</p>

<p>Sjúkrakassagrunnur Føroya fer á samkomu seinnapartin at kunngera, hvussu fæið skal nýtast, til trý høvuðsøki innan heilsugransking í Føroyum.</p>

<p><strong>Samtykt í 2012</strong></p>

<p>Í 2012 samtykti Løgtingið, at fæið, sum tá var eftir í føroysku sjúkrakassunum, skuldi brúkast til at menna heilsuøkið í Føroyum við atliti til gransking.</p>

<p>Meginfelag Sjúkrakassa Føroya og Heilsumálaráðið stovnaðu í apríl 2013 Sjúkrakassagrunn Føroya, ið fekk sum uppgávu at gera leiðreglur fyri, hvussu fæið skal brúkast.</p>

<p>Í nevndini fyri Sjúkrakassagrunn Føroya eru umboð fyri Sjúklingaráðið, Meginfelag teirra brekaðu, Landsfelag pensjónista, fakfeløgini á almenna og privata arbeiðsmarknaðinum, Heilsumálaráðið og Meginfelag Sjúkrakassa Føroya.</p>

<p>Tað verður nú Granskingarráðið, ið er fyrisitingin hjá Granskingargrunninum, saman við eini faknevnd, sum fer at lýsa við stuðulsmøguleikum, <a href="http://www.gransking.fo/Default.aspx?pageid=2288&amp;NewsItemID=18284" target="_blank">skrivar gransking.fo</a>.</p>