Málið í Marknagili: Dømdur seks ára fongsul

69 ára gamli Páll Hansen, sum framdi so grovan harðskap móti einum 61 ára gomlum manni, at hann doyði av harðskapinum, fekk seks ára fongsulsrevsing.

Tað var revsingin, sum ákæruvaldið kravdi. 

Páll Hansen er harafturat dømdur fyri at fara frá manninum, sum hann stakk, uttan at hjálpa honum ella senda boð eftir hjálp. Og hann er dømdur fyri ólógliga at fara inn í íbúðina hjá tí 61 ára gamla manninum. 

Hann fór inn gjøgnum altandyrnar, hurðin var ikki læst. Báðir menninir búðu í sama húsi í Marknalíð í Havn. Tann 61 ára gamli maðurin leigaði frá Pálli Hansen, men skyldaði honum húsaleiga fyri nakrar mánaðir.

Húsaleigan var orsøkin til, at Páll Hansen ætlaði at tosa við leigaran hetta kvøldið í november í fjør.     

Dømdi maðurin skal eisini rinda sakarkostnaðin og soninum hjá manninum, sum doyði, 27.000 krónur í endurgjaldi.

Eftir at hava viðgjørt málið í góðar sjey tímar í gjár frídømdu nevningarnir Páll Hansen fyri dráp.

Hann var í fyrsta lagi ákærdur fyri dráp og í øðrum lagi fyri serliga grovan harðskap, sum gjørdi, at tann 61 ára gamli maðurin doyði av knívsstungu, sum kvetti ein lívæðr í bringuni.

Nevningarnir søgdu, at talan var ikki um neyðverju hjá ákærda manninum.

Nevningatingið tók fyrilit fyri, at 69 ára gamli Páll Hansen var undir trýsti og ikki so væl fyri sálarliga, tá hann framdi tað, sum hann nú er dømdur fyri.  

Páll Hansen noktaði seg sekan í ákærunum.  

Jógvan Páll Lassen, verji hjá Pálli Hansen, sigur, at teir fara ikki at skjóta revsingina inn fyri Landsrættin.