Fundur um Ukraina tykist hava munað

Vladimir Putin, forseti hevur biðið russisku fregnartænastuna herða eftirlitið við markið til Ukraina.

Endamálið er forða fyri, at russiskir uppreistrarmenn í Eysturukraina fáa vápn og aðra hjálp úr Russlandi.

Boðini frá russiska forsetanum koma dagin eftir fundin við amerikanska forsetan Barak Obama, ið Vladimir Putin hitti, tá báðir vóru til 70 ára hátíðarhaldið fyri D degnum og sameindu landgongdini í Normandínum, sum gjørdi enda á nazista Týsklandi.

Fundurin millum Barak Obama og Vladimir Putin í Fraklandi í gjár vardi bert eitt korter.

AFP tíðinsastovan skrivar, at Vladimir Putin skal hava biðið russisku marknavørðarnar við markið til Ukraina taka øll neyðug stig fyri at forða fyri, at ólóglig ferðsla er um markið millum londini.

Hósdagin varð upplýst úr ukrainska høvuðsstaðnum Kiev, at russiskir uppreistrarmenn í Eysturukraina høvdu tikið trý marknalið millum Ukraina og Russland.

Vladimir Putin hitti eisini nývalda ukrainska forsetan Petro Porosjenko í Fraklandi í gjár.

- Samskiftið er byrjað, segði Petro Porosjenko við ukrainskt sjónvarp eftir fundin, og boðaði frá, at eitt umboð fyri russisku stjórnina fer at koma til Kiev at hitta ukrainsku stjórnina við tí endamáli at leggja niður stríðið við russisku uppreistrarmenninar í Eysturukraina.