Varðhaldsfongslaður fyri harðskap

<p>Tað var leygarkvøldið um nátturðatíð, at løgreglan fekk fráboðan um, at ein maður hevði sligið ein 40 ára gamlan útlendskan mann í andlitið. Útlendingurin er í Føroyum í sambandi við átakið hjá Sea Shepherd, og hann sat hetta kvøldið á varðhaldi í einum bili og kikaði eftir grindahvali.</p>

<p>21 ára gamli maðurin greiddi í grundlógarforhoyri í morgun frá, at hann vildi tosa við útlendingin og spyrja hann um, hví hann fyrr í summar hevði gjørt seg inn á bilin hjá pápa hansara. Men útlendingurin hevði bara flent at honum, og tí gjørdist hann illur og langaði honum nevan í andlitið tvær ferðir.</p>

<p>Nakrar tímar seinni fekk løgreglan fráboðan um, at 21 ára gamli maðurin hevði sligið ein annan mann, ein&nbsp;føroying, í andlitið við nevanum. 21 ára gamli maðurin var í báðum førum ávirkaður av rúsdrekka, og tí mintist hann ikki alt sum fór fram, men hann játtaði seg partvíst sekan í at hava framt harðskap.</p>

<p><strong>Noktar nakrar av skuldsetingunum</strong></p>

<p>Ákæruvaldið vísti 21 ára gamla mynd av útlendinginum við skaðum í andlitinum. Ungi maðurin segði í rættinum, at hann hevði ikki ábyrgdina av øllum skaðunum, sum maðurin hevði fingið.</p>

<p>Millum annað var eitt merkið í andlitinum, sum 21 ára gamli maður sigur, at hann ikki hevur gjørt, tí hann slóg hann ikki har. - Hann hevur sjálvur gjørt skaða á seg, segði 21 ára gamli.</p>

<p>Á heimasíðuni hjá Sea Shepherd var mynd av útlendinginum, sum vísir hondina, sum eisini er innbundin. Men í rættinum kom fram, at talan helst er um ein fingur, sum er farin úr lið.</p>

<p><strong>Varðhaldsfongslaði dømdur fyri harðskap áður</strong></p>

<p>Av tí at 21 ára gamli maðurin hevði treytaðan dóm fyri harðskap frá november í fjør, avgjørdi rætturin at varðhaldsfongsla hann, meðan løgreglan kannar málið.</p>

<p>Maðurin, ið nú er varðhaldsfongslaður í 14 dagar, varð tá dømdur 60 daga fongsul, men fekk í staðin 150 tímar samfelagstænastu.</p>

<p>Nú verða so hesir 60 dagarnir settir í verk, og maðurin skal í hvussu er inn at sita í 60 dagar.</p>