Føroyar áseta sær egna kvotu av norðhavssild

Tað verður gjørt, eftir at samráðingarnar í London í vikuni ikki førdu til nakað úrslit, og samráðingar verða ikki aftur um norðhavssildina í ár.

Føroyar sum vóru formansland í samráðingunum um sildina, hava latið formansskapin til norðmenn, sum hava formansskapin í 2016.

Hvussu stór føroyska sildakvotan verður, vil Jacob Vestergaard, landsstýrismaður ikki siga nakað um enn.

Hann sigur, at fyrst skal úrslitið av samráðingunum viðgerast, og síðani fer hann at kunna Uttanlandsnevndina hjá løgtinginum um støðuna. Ikki fyrr enn eftir tað, verður føroyska sildakvotan ásett.

Í fjør ásett Føroyar sær 40.000 tons av norðhavssild, og tað svaraði til 10 prosent av samlaðu sildakvotuni.

Í ár er samlaða sildakvotan sett til 283.000 tons.

Jacob Vestergaard, landsstýrismaður hevur fyrr sagt, at Føroyar hava ligið aftast, tá talan er um at býta norðhavssildina. Har eiga Føroyar at ligga sum nummar tvey, eftir Noreg, og so eiga hini londini at koma aftaná, tá býtt verður.