Reglur skulu tryggja áhugamálini hjá landinum

Løgtingið hevur einmælt samtykt eitt uppskot frá løgtingsgrannskoðarunum um, at landsstýrið skal gera reglur, sum tryggja, at áhugamálini hjá landinum í partafeløgum, stovnum og grunnum verða forsvarliga røkt.

Ein samd fíggjarnevnd tók undir við uppskotinum. Tað almenna eigur seks milliardir krónur í partafeløgum og grunnum.

Løgtingsgrannskoðararnir vilja hava, at landsstýrið tryggjar sær, at tað hevur ávirkan, sum svarar til váðan ella kostnaðin, landið átekur sær. Løgtingsgrannskoðararnir vilja hava landsstýrið at orða ein eigarapolitikk.

Teir skjóta eisini upp, at landsstýrismaðurin skal gera eina árliga frágreiðing um virkiseindirnar, sum landið eigur ella er uppií, men sum ikki eru í fíggjarlógini. Øll 25 tingfólkini, sum vóru í tingsalinum, atkvøddu fyri uppskotinum.