Fyrrverandi forseti 20 ár í fongsul

Ein dómstólur í Egyptalandi hevur í dag dømt fyrrverandi forsetan í Egyptalandi, Mohamed Morsi, 20 ár handan rimarnar.

Dómin fekk hann, tí hann eggjaði til at mótmælisfólk vórðu myrd í desember 2012. Eygleiðarar hava áður sagt, at hann kundi verða dømdur til deyða.

Sat ikki leingi

Mohamed Morsi sat ikki leingi við valdinum fyri borðendan í Egyptalandi. Í juni mánað í 2012 varð hann valdur til forseta í landinum.

Bert eitt ár eftir at Mohamed Morsi hevði tikið við sum fyrsti fólkavaldi forsetin í Egyptalandi, varð hann rikin frá valdinum aftur 3. juli í 2013.

Fyri einum ári síðani vórðu 529 fólk í Muslimska Brøðralagnum í Egyptalandi deyðadømd, tí fólkini høvdu stuðlað Mohamed Morsi, tá hann hevði valdið í landinum.