ST: Hetta er besta landið í heiminum

- Tað er eydnast Noreg at vaksa um inntøkurnar og at býta inntøkurnar nøkulunda javnt. Landið ger stór framstig tá talan er um javnstøðu, og mennir útbúgving og heilsu, stendur í niðurstøðuni.

Tað eru onnur lond, sum eisini liggja frammarlaga í metingini. Millum annað Avstralia, Sveis, Danmark og Holland. Niðast í uppgerðini eru afrikansku londini, Niger, Eritrea og Kjadd.

Í frágreiðingini vísir ST á, at stór framstig eru hend síðani fyrsta frágreiðingin varð gjørd í 1990. Síðani tá hava tvær milliardir fólk fingið munandi betri umstøður.

Vísa á ójavnvág á arbeiðsmarknaðinum

Í frágreiðingin verður dentur lagdur á, at neyðugt verður, at fleiri sleppa til arbeiðis. Í tí sambandi er neyðugt at staðfesta, hvat arbeiði er, og talan kann vera um frítíðarvirksemi, at ansa eldri í familjuni og annað. Tað arbeiði eigur at verða virt meir enn nú.

Neyðugt er eisini at virða rættindini hjá teimum sum arbeiða, tí globaliseringin hóttir nógv arbeiðspláss. Frágreiðingin vísir á, at sum nú er arbeiða kvinnur 52 prosent av øllum arbeiði, men tær fáa bert ein triðing av útgoldnu lønunum.

Tí er neyðugt at broyta gongdina. Og neyðugt er eisini at fólk í so stóran mun sum gjørligt, sjálvi sleppa at velja, hvat arbeiði tey vilja røkja, sigur ST í frágreiðingini.