Eingin broyting í fongslinum

Skien-fongslið fer ongar broytingar at gera í umstøðunum hjá Anders Behring Breivik. 

Býarrætturin í Oslo gav Breivik og sakførara hansara viðhald í, at umstøðurnar hjá 37 ára gamla Breivik í fongslinum, eru brot á mannarættindini, - serliga orsakað longu og umfatandi isolatiónina, sum hann framvegis situr í.

Sakførarin hjá Breivik, Øystein Storrvik, segði eftir dómin, at hann gongur út frá, at umstøðurnar verða broyttar í fongslinum.

Men tað verður av ongum, sigur Ole Krisoffer Borhaug, stjóri í Skienfongslinum við NTB. 

Breivik situr í eini lon við serliga høgum trygdarstøði.

- Soleiðis sum eg tulki dómin, snýr hetta seg meira um broytingar í skipanini. Vit skulu halda okkum til galdandi reglur, og tí halda vit fram sum fyrr, sigur Borhaug.