30 dagar í fongsul fyri hasjsmugling

Ein 26 ára gamal maður skal 30 dagar í fongsul fyri at hava roynt at smugla inn til Føroya 126,9 gram av hasji.

Í rættinum seinnapartin kom fram, at maðurin keypti hasjið á Christiania á Amager. Mikudagin kom hann til Føroya við hasjinum, sum hann hevði fjalt innvortis.

SÍ EISINI Varðhaldsfongslaður fyri afturlatnum hurðum

Maðurin varð kannaður í tollinum í Vágum, og varð síðani handtikin. Ákæruvaldið kravdi unga mannin dømdan treytaleysa fongsulsrevsing fyri at royna at smugla inn hasj, og fyri at hava ætlanir um at lata øðrum hasj.

Ungi maðurin játtaði seg sekan í at hava smuglað, men segði, at hann hevði ongar ætlanir um at selja tað.

Lovaði at taka sær betri partar fyri

- Tað, sum eg ikki brúki sjálvur, bjóði eg øðrum, tá vit eitt nú eru í morgunballi. Tá plaga øll at fáa burturav tí, sum vit hava, segði 26 ára gamli maðurin í rættinum.

Maðurin segði eisini í rættinum, at slapp hann undan treytaleysu fongsulsrevsingini, skuldi hann ongantíð gera hetta aftur.

Dómarin lurtaði, men dømdi mannin 30 daga fongsul, og mælti unga manninum til kortini at halda lyftið, um ikki at gera tað aftur. Maðurin góðtók dómin.