Trygdin var ikki í lagi: 15.000 í bót

Búsetur er dømt at rinda 15.000 krónur í bót fyri brot á arbeiðs- og umhvørvislóggávuna, tá ið eitt starvsfólk hjá Búsetri, Súni úr Hørg, datt gjøgnum hol í eini tekju í marts í 2014.

Fallið var 10 metrar, og tað stóð um lív hjá Súna úr Hørg. Hann yvirlivdi, men fekk álvarsligt mein. Millum annað misti hann 95 prosent av sjónini.

Tað vóru tvær kunngerðir, sum Búsetur ikki hevði yvirhildið: "kunngerð um skipan av byggiplássi" og "kunngerð um útinnan av arbeiði."

SÍ EISINI Góðtaka ikki sektaruppskot

Leivur Persson, leiðari á arbeiðseftirlitinum, sigur, at Arbeiðseftirlitið fyrst mælti fútanum til at gera eitt sektaruppskot um, at Búsetur skuldi rinda 20.000 krónur í bót.

Við dóminum í dag lækkaði bótin úr 20.000 niður í 15.000 krónur, tí mett varð, at Búsetur hevði "víst vilja til at skipa arbeiðið á fullgóðan hátt."

Súni úr Hørg varð settur í fast starv sum timburmaður hjá Búsetri í apríl í ár. Eitt annað mál um endurgjald til Súna úr Hørg er til viðgerðar hjá Vanlukkutryggingarráðnum.