Umfatandi átøk mugu setast í verk

Størri altjóða átøk og íløgur mugu gerast í stríðið móti tuberklum, sigur heimsheilsustovnurin hjá ST, WHO.

Í árligu tuberklafrágreiðing síni skrivar heimsheilsustovnurin hjá ST, WHO, at øll limalondini í 2014 bundu seg til málið um at minka tuberklatilburðirnar við 80 prosentum, og at minka deyðstilburðirnar av tuberklum við 90 prosentum fyri 2030.

Men gongdin vísir, at størri átøk og íløgur mugu til, um hesi mál skulu røkkast, sigur Margareth Chan frá WHO sambært medscape.com.

Millum 10 tær deyðiligastu sjúkurnar

- Umfatandi átøk mugu gerast, annars fara lond framhaldandi at lúta fyri hesi farssóttini, og vit fara ikki at røkka settu málunum, sigur Margareth Chan frá WHO. Í 2015 vóru umleið 10,4 milliónir nýggir tilburðir av tuberklum í heiminum.

60 prosent av nýggju tilburðunum vórðu staðfest í seks londum: Í India, Indonesia, Kina, Nigeria, Pakistan og Suðurafrika. Mett verður, at 1,8 milliónir fólk doyðu av tuberklum í 2015.

Hóast 22 prosent færri doyðu av tuberklum í fjør enn í 2000, so eru tuberklar enn á listanum yvir 10 tær deyðiligastu sjúkurnar í heiminum, tí fleiri doyggja av tuberklum enn av malaria og HIV til samans, sigur WHO.