Kanna nú arbeiðsóhapp

Topas var staddur 40 fjórðingar suður úr Suðuroynni, tá óhappið hendi. Ein av manningini kleimdist millum vektina og lúnningina. 

Sambært reiðaranum á Topas, Hans Andrias Kelduberg, hevur maðurin einki brotið, men hann fekk stóran skaða innvortis.

Flogin til lands

Neyðugt var at flyta mannin á Landssjúkrahúsið, og har varð hann lagdur undir skurð. 

Boð vórðu send eftir tyrluni, og ein tíma og 50 minuttir seinni var maðurin á Landssjúkrahúsinum, sigur Hans Andrias Kelduberg.

Hann fegnast um, at so skjótt var borið at við tyrluni, tí tað hevði tikið Topasi sjey-átta tímar at siglt inn á Havnina við manninum. 

Allar kanningar ikki lidnar

Topas siglur undir føroyskum flaggi. Reiðaríið hevur skrivað frágreiðing um hendingina, og Sjóvinnustýrið hevur verið umborð og kannað óhappið.

Sjóvinnustýrið krevur nakrar broytingar umborð á skipinum fyri at fyribyrgja at slíkt hendir aftur, sigur Sjóvinnustýrið, og Hans Andrias Kelduberg, stjóri, váttar tað. 

Sjóvinnustýrið vil einki siga um málið, tí tey eru ikki liðug vil allar kanningar enn. Topas fer væntandi til fiskiskap aftur í dag.