Túsundtals flyta undan Brexit

París og aðrir stórbýir í Europa eru nú farin undir at fyrireika seg til at taka ímóti túsundtals arbeiðsfólkum í fíggjarheiminum, tá Brexit verður veruleiki.

Málið hjá París er at fáa minst 20.000 slík fólk at flyta til býin. Í løtuni eru umleið 180.000 fólk í París, sum arbeiða í fíggjarheiminum.

SÍ EISINI Bretar nýggjan ES-sendiharra

Tað ræður um at vera tíðliga á veg, tí bretski forsætisráðharrin, Theresa May, hevur boðað frá, at Bretland fer undir samráðingar við ES um framtíðina áðrenn mars er liðin.

Fleiri aðrir býir liggja eisini framvið, millum annað verður tosað um Berlin, Dublin, Luksemborg og Frankfurt. Øll plássini vilja hava fólk í fíggjarheiminum at flyta til sín.

70.000 størv kunnu hvørva úr Bretlandi

Blaðið Independent skrivar, at fleiri bretskar fíggjarfyritøkur longu eru farnar undir samráðingar við Írland, fyri at fáa neyðugu loyvini til vega, so tær kunnu virka í Dublin.

Írar vilja verða verandi í ES, hóast Bretland fer burturúr samveldinum. Fleiri aðrar fyritøkur eru samstundis farnar at føla seg fyri í øðrum stórbýum í Europa, skrivar The Independent.

Bretska lobbyfyritøkan, TheCityUK, hevur ávarað um, at upp í 70.000 arbeiðspláss í fíggjarheiminum kunnu hvørva úr Bretlandi tá Bretland fer úr ES.