Brimil úr at gera

Klokkan tvey í gjár boðaði trolbáturin Hansa Maria frá maskintrupulleikum. Hansa Maria var stødd norður úr Fugloynni.

Brimil kom til Hansu Mariu klokkan fýra og kom á Klaksvík við henni klokkan trý korter til tíggju í gjárkvøldið.

Triðja sleipið

Hetta var triðja sleipið hjá Brimli í tvey samdøgur, upplýsir Vørn.

Trolbáturin Búgvin boðaði mánakvøldið frá, at teir høvdu fingið trolið um skrúvuna. Teir vóru staddir á Skeivbanka.

Brimil kom til Búgvan um tveytíðina týsnáttina og sleipaði hann til Vestmanna, hagar skipini komu klokkan ellivu fyrrapartin týsdagin.

Bara fýra tímar millum sleip

Í gjáramorgunin klokkan fimm komu so boð frá skeljabátinum Norðheimi um, at teir høvdu maskintrupulleikar stutt suður úr Eystnesi.

Brimil var hjá Norðheimi longu klokkan sjey og sleipaði hann til Oyrar, hagar skipini komu klokkan tíggju fyrrapartin í gjár. 

Og fýra tímar seinni vóru so aftur boð eftir Brimli, hesa ferð frá Hansu Mariu.