Vina- og kenningapolitikkur fekk avleiðingar

Danska blaðið BT hevur seinastu mánaðirnar avdúkað, hvussu Bettina Jensen gav fyrrverandi starvsfeløgum uppgávur sum uttanhýsis ráðgevar og løn á meir enn 20 milliónir krónur millum 2011 og 2013. Kvinnurnar hava allar eina fortíð í Danmarks Radio, har tær arbeiddu saman.

Avdúkingarnar í BT fingu fleiri politikarar at ressast, og krav var sett Søren Pind, løgmálaráðharra, um at kanna málið nærri.

5 mió. kr. í eitt hálvt ár

Frágreiðingin hjá løgmálaráðnum gjørdi greitt, at samsýningar vóru útgoldnar uttan sáttmálar, og at fíggjarætlanir manglaðu fyri fleiri verkætlanir.

Hetta hevði havt við sær, at samsýningarnar gjørdust óvanliga høgar.

Eini ráðgevin fekk eina løn uppá slakar 5 milliónir krónur í bara eitt hálvt ár uttan at sáttmáli var gjørdur frammanundan. Hin ráðgevin fekk 2,6 milliónir krónur í 2012, fyri arbeiði, sum hon enn ikki hevur gjørt liðugt.

Og nú hevur Ríkispolitiið boðað BT frá, at ein sínámillum avtala er gjørd við Bettinu Jensen, deildarleiðara, sum hevur við sær, at hon er farin úr starvinum.