Gleðiboð: Frítíðarlønin kemur týsdagin

Týsdagin, 2. mai, kemur frítíðarlønin á kontu í peningastovnunum. 

29.516 fólk fáa frítíðarløn í ár, og tey fáa tilsamans 406 milliónir krónur.  Tað er í miðal góðar 13.700 krónur. Tað sigur Taks.

Frítíðarlønin verður altíð goldin á somu kontu, sum tú fekst frítíðarløn inn á í fjør, um tú ikki hevur boðað frá broyting. 

Og tey, sum ikki hava kontu at flyta frítíðarlønina á, skulu ikki fella í fátt. 

Sonevndur "slippur" verður sendur til tann, sum eigur frítíðarlønina. Slippurin skal latast einum av peningastovnunum, sum síðan rindar út frítíðarlønina. 

Men er slippurin ikki latin peningastovni innan eitt ár, fellur peningurin til Frítíðargrunnin, sigur Taks.

Tey, sum hava Mín-boks hava longu fingið boð um, hvussu nógva frítíðarløn tey fáa. Vit onnur mugu bíða, til Posta hevur borið út brøvini.