Schengen-eftirlitið herðast

Eftirlitið í Schengen økinum skal herðast, tað vil siga at fólk sum ætla sær inn í Schengen økið, skulu kannast betri enn nú.

Tað hevur ES samtykt, og Danmark tekur undir við átakinum, sigur danski ráðharrin, Inger Støjberg. Endamálið við átakinum er at forða fyri at víðgongdir islamistar koma um markið og inn í Europa.

Higartil hava tað verið borgarar úr sonevndum triðjalondum, sum eru kannaðir gjølla, men í framtíðini skulu eisini borgarar í ES londunum kannast gjølla, hvørja ferð tey koma inn í ES.

SÍ EISINI Herda eftirlitið heldur fram

Orsøkin er, at víðgongd fólk, sum eru borgarar í ES, seinastu árini eru farin til onnur lond at virka saman við víðgongdum felagskapum, sum standa á listanum fyri yvirgangsfelagskapir. 

Síðani eru tey komin aftur til ES, uttan at hava verið kannað nærri enn fólk vanliga verða. Nýggju reglurnar skulu forða fyri, at hesi fólkini ótarnað kunnu koma aftur til ES londini.

Hvørja ávirkan herdu reglurnar fara at hava, er ikki greitt, men roknað verður við, at fólk mugu hava betri tol, tá tey skulu við flogfari, tí bíðitíðin í floghavnunum kann gerast liongri enn nú.