Paul Ryan strikar boð á Twitter

Formaðurin í umboðsmannatinginum í USA, Paul Ryan, hevur gjørt sum forsetin í USA hevur gjørt so mangan og fingið mikið uppmerksemi fyri eini boð, hann sjálvur hevur skrivað á sosiala miðlinum Twitter. Og so hevur Paul Ryan strikað boðini aftaná, tí tey fullu ikki í góða jørð. Eitt nú hava fleiri demokratar og nógvar Twitter-brúkarar havt at Ryan.

Tað skriva fleiri altjóða miðlar í dag.

Í boðunum royndi Ryan at vísa á, at skattalættin hjá Republikanska flokkinum, sum hann er partur av, var væleydnaður. Sum dømi um tað nevndi hann eitt alment settan skrivara, sum fekk hálvanannan dollara í lønarhækking. Altso smáar níggju krónur um vikuna.

Hetta hevur fingið fleiri at vísa á, at Paul Ryan ikki hevur samband við ella skil fyri gerandisdegnum hjá vanliga amerikanarinum.