Merkel vil vinna álitið aftur

- Læran av hesum er, at eg sum kanslari má tryggja, at vit vinna álitið aftur.

Hetta segði Angela Merkel, samveldiskanslari í røðu fyri týskum vinnulívið í gjár, har hon gjørdi viðmerkingar til lemjandi valúrslitið hjá CSU í Bayern sunnudagin. 

CSU situr í samveldisstjórn saman við flokkinum hjá Merkel, CDU, og hon segði bart út, at vánaliga valúrslitið vísir, at veljararnir hava mist álitið á stjórnina.

- Eg fari at leggja so nógva orku í hetta arbeiðið, sum eg kann, segði samveldiskanslarin í røðu síni. 

Eygleiðarar meta, at afturgongdin hjá CSU fyrst av øllum fer at styrkja um stríðið, sum hevur valdað millum formannin í CSU, Horst Seehofer og Angelu Merkel.

Seehofer hevur verið í beiskum og lutvíst duldum valdsdysti móti Merkel, síðani samveldiskanslarin í 2015 gjørdi av, at meira enn ein millión flóttafólk og tilflytarar skuldu sleppa til Týsklands.

Seehofer er innanríkisráðharri í samveldisstjórnini hjá Merkel. Í stjórnini sita kristiligu demokratarnir í CDU, CSU, umframt týsku sosialdemokratarnir, SPD.