Bretar kunnu steðga Brexit

Bretar kunnu steðga Brexit. Soleiðis sigur embætismaðurin Manuel Campos Sanchez-Bordona vegna ES-dómstólin í svari til nakrar skotskar advokatar.

Skotsku advokatarnir hava spurt, um Bretland kann taka aftur avgerðina um at fara úr ES uttan loyvi frá hinum ES-londunum.

Dómstólurin hevur fyri fyrst sent eitt svar, sum ljóðar, at hetta er møguligt við tí fyrivarni, at dómstólurin noyðist at kanna málið nærri, áðrenn endaligt svar kann gevast.

Svarið frá ES-dómstólinum kemur samstundis, sum bretska undirhúsið skal kjakast um Brexit-avtaluna hjá Theresu May fyri síðani at atkvøða um avtaluna týsdagin komandi viku.

Sanchez-Bordona sigur í skrivligari viðmerking, at hevur eitt land tikið avgerð um at fara úr ES, so eigur tað eisini at hava møguleika at broyta hugsan í tvey ára langa tíðarskeiðnum frá tí, at artikul 50 í ES-sáttmálanum er aktiveraður, og til landið endaliga er limað úr felagsskapinum.

Spurningurin um Bretland kann hálsa um hevur fyrr verið uppi og vent síðan fólkaatkvøðuna í 2016, tá ið bretar atkvøddu fyri at fara úr ES.

Men hann hevur fingið vind í seglini seinastu vikurnar. Í Bretlandi eru tað tey, sum halda, at umstøðurnar eru so nógv broyttar síðan fólkaatkvøðuna, at bretska fólkið eigur at vera spurt einaferð enn.

Hetta er ein møguleiki, men so skal bretska undirhúsið týsdagin vraka avtaluna, sum Theresa May hevur gjørt við ES.

Tey, sum taka undir við Brexit, finnast at ES-dómstólinum fyri at koma við viðmerkingini nú. Hetta er at blanda seg upp í ein spurning, sum skal svarast í Bretlandi, halda tey.