May heldur fram sum forsætisráðharri

Tað er greitt eftir atkvøðugreiðsluna um uppskotið um misálitisváttan, sum 48 konservativir parlamentslimir reistu móti henni í gjár.

Tá avtornaði, vann Theresa May atkvøðugreiðsluna.

200 søgdu seg framvegis hava álit á henni, og 117 søgdu seg ikki hava álit á forsætisráðharranum.

Theresa May sigur, at hon er fegin um stuðulin, men hon viðgongur, at nógv atkvøddu fyri misálitinum.

- Eg havi lurtað eftir tí, sum mótstøðufólkini siga, segði Theresa May í gjárkvøldið, tá úrslitið av atkvøðugreiðsluni varð greitt í gjárkvøldið.

Nú verður hildið fram við Brexit, segði hon.

Theresa May segði í gjár, at hon fer ikki at standa á odda í konservativa flokkinum upp undir næsta parlamentsvalið, sum verður í seinasta lagi í 2022.

Men hon segði einki um, nær hon ætlar at leggja frá sær sum floksleiðari.

Í dag fer Theresa May til Brússel at hitta hinar ríkis- og stjórnarleiðararnar í ES um markið millum Norðurírland, sum fer burtur úr ES saman við Bretlandi, og Írland, sum heldur fram í ES.

Backstop-avtalan, sum hon verður nevnd, skal tryggja, at tað verður ikki neyðugt at hava tollarar á markinum, hóast Bretland og ES ikki verða samd um eina fríhandilsavtalu, eftir at Brexit er komið í gildi.

Tað ber í sær, at Bretland verður verandi í tollsamgongu við ES. 

Men fleiri konservativir parlamentslimir stúra fyri, at Bretland við hesi avtaluni ongantíð sleppur burtur úr ES.