May móti fólkaatkvøðu

Møguleikin fyri nýggjari fólkaatkvøðu um Brexit fyllir nógv í orðaskiftinum í Bretlandi í løtuni.

Fleiri ráðharrar vilja hava nýggja fólkaatkvøðu, og tað gera fyrrverandi forsætisráðharrarnir, John Major og Tony Blair, eisini.

Men Theresa May, forsætisráðharri, er ímóti eini nýggjari fólkaatkvøðu, tí hon fer at fremmandagera bretska fólkið og oyðileggja álitið á politisku skipanina, sigur hon.

Í síðstu viku avlýsti Theresa May eina atkvøðu í undirhúsinum um avtaluna, sum hon hevur gjørt við ES, tí hon ikki væntaði, at hon fór at verða samtykt.

Tony Blair hevur sagt, at hann virðir miðvísu royndirnar hjá May at fáa eina avtalu, men at tá ið so nógv tingfólk eru ímóti, er eingin meining í at halda fram við at "grava". sum hann málber seg.

Eftir at hava samráðst í 30 mánaðar og við ruðulleika í stjórnini, so er ráðiligast at lata fólkið taka avgerð, sigur Tony Blair.

Men hesum mælir Theresa May staðiliga frá:

"So siga vit við tey, sum atkvøddu fyri seinastu fólkaatkvøðu, at okkara fólkaræði ikki riggar. Ein nýggj atkvøða hjálpir ikki, og hon fer bara at elva til meira tvídrátt í samfelagnum, júst tá ið vit eiga at arbeiða fyri at semjast" sigur Theresa May.

Hon leggur afturat, at Tony Blair undirgravar embætið, sum hann plagdi at sita í, við at mæla til nýggja fólkaatkvøðu.