Blóðreyður jólaaftan á Wall Street

Jólaaftan gjørdist tann vánaligasti nakrantíð á keypsskálanum í Wall Street. Tað staðfestu amerikanskir miðlar, tá keypsskálin lat aftur og fór í jólafrí í gjárkvøldi.

Leiðandi Dow Jones index'ið fall við 2,9 prosentum, bara í gjár.

Harvið varð punktum sett fyri einum blóðreyðum desember mánaða á amerikanska partabrævamarknaðinum.

Bara í síðstu viku fall Dow Jones index'ið umleið sjey prosent, og tað er størsta fallið eftir fimm handilsdøgum síðani fíggjarkreppuna í 2008. 

Íleggjarar óttast, at búskaparvøksturin steðgar og USA kann vera á veg inn í eina nýggja fíggjarkreppu.

Órógvið á amerikanska keypsskálanum hevur breitt seg til japanska keypsskálan.

Tá keypsskálin í Tokyo lat aftur, var leiðandi Nikkei index'ið fallið meira enn fimm prosent.