Flóðalda kostar 429 mannalív

Almenna talið av deyðum eftir flóðalduna, sum hevur rakt Indonesia, er nú komið upp á 429 fólk. Harumframt eru 128 fólk framvegis ikki komin afturíaftur.

Sambært myndugleikunum á staðnum hava eisini okkurt um 1500 fólk fingið skaða. Bjargingarlið á staðnum óttast, at talið av deyðum fer at økjast enn meira.

Flóðaldan rakti Sundaoyggjarnar í Indonesia leygarkvøldið, lokala tíð. Harðast raktu økini vóru strendurnar í Pandeglang, Serang og Lampung, sum liggja í Sundastrætinum millum Java og Sumatra.

Fólk í túsundatali eru flutt burtur úr økinum av trygdarávum, skuldi ein flóðalda afturat rakt økið. 

Í gjár vitjaði indonesiski forsetin, Joko Widodo, vanlukku raktu økini, har fólk framvegis ikki eru komin afturíaftur.