Nýggj gøla um hvítting

Nýggjur dátuleki vísur, at miljardir av krónum eru fluttar gjøgnum Swedbank til millum annað Bretsku Jomfrúoyggjarnar og Belize.

Tað skrivar Berlingske, sum hevur tíðindini frá sjónvarpsendingini Uddrag Granskning hjá svenska kringvarpinum, SVT.

Sendingin hevur í fimm mánaðir havt atgongd til og hevur greinað loynilig skjøl, sum millum annað lýsa peningaflutning millum Danske Bank og Swedbank.

Meira enn 1.000 viðskiftafólk eyðmerkt

Peningaflutningurin er frá tíðini eftir at Danske Bank keypti seg inn í londini í Eystrasalti og til deildin fyri ikki-estisk viðskiftafólk varð latin aftur í 2015. 

Meðan málið um hvítting í Danske Bank vaks, hevur leiðslan í Swedbank fleiri ferðir sagt, at tey hava ikki útlendsk viðskiftafólk, sum flyta pening gjøgnum bankan. 

Men svenska sjónvarpssendingin hevur eyðmerkt meira enn 1.000 viðskiftafólk í Swedbank, sum hava kontu í Baltalondum, men búgva í øðrum landi, sum eru kend í hvítting-gøluni í Danske Bank.

Stjórin vil ikki viðmerkja málið

Talan er um slakar 42 milliardir danskar krónur, sum eru fluttar gjøgnum konturnar, og sum sambært Uppdrag Granskning vekja størsta illgrunan.

Stjórin í Swedbank vildi ikki gera samrøðu við Uppdrag Granskning, men sendi samskiftisfólkið hjá bankanum, Gabriel Francke Rodau.

- Vit viðmerkja ikki ítøkilig dømi, men í Swedbank hava vit null-toleransu, tá tað snýr seg um hvítting, og eru tekin um nakað, handla vit, segði Gabriel Francke Rodau, samskiftisfólk hjá Swedbank, í sendingini Uppdrag Granskning hjá SVT, sambært Berlingske

- Men vit mugu eisini minnast, at fyri alla vinnugreinina er hetta ein av størstu avbjóðingunum, og tað, sum tit tosa um, er grovt kriminelt virksemi, segði Gabriel Francke Rodau.