MEST 16 milliónir krónur í avlopi í 2018

Nettosølan var 446 milliónir krónur og bæði skipasmiðju- og framleiðsluraksturin gav avlop, eins og dótturfelagið PAM Offshore Service eisini hevði yvirskot í fjør. Í MEST samtakinum starvast gott 400 starvsfólk.

Gongdin seinastu árini hevur verið góð, og er MEST ein fíggjarliga sterk fyritøka við einum soliditeti yvir 40%.

MEST samtakið fevnir um MEST skipasmiðjurnar í Havn og á Skála, MEST framleiðsluútgerð í Runavík og PAM-Offshore Service, sum veitir tænastur til frálandavinnuna í Noregi.

Leiðslan metir, at útlitini til aftur at fáa eitt nøktandi úrslit eru til staðar, og tað er við góðum treysti at farið er inn í 2019.

Upplýst verður, at gongd nú er komin á at byggja nýggja havrannsóknarskipið, og at skrokkurin kemur til Føroyar seint í summar, sigur Mouritz Mohr, stjóri.