SAS-verkfall: 673 avlýsingar - eisini í Føroyum

Flogskipararnir hjá SAS í Norðurlondum eru farnir í verkfall, og tað ávirkar eisini føroysku flogrutuna.

SAS-flogfarið, sum skuldi lenda í Vágum á døgurða, er avlýst.

Fráferðin úr Vágum ein tíma seinni er tí eisini avlýst, stendur á yvirlitinum hjá Vága Floghavn.

Langt frá hvørjum øðrum

Samráðingarnar millum flogfelagið og umboð fyri flogskipararnar í ávíkavist Danmark, Noregi og í Svøríki vardu alla náttina, men steðgaðu í morgun.

 - Vit eru langt frá hvørjum øðrum, staðfesti næstformaðurin fyri Danska Flogskiparafelagið Henrik Thyregod, tá hann kom út úr samráðingarhølunum í morgun, sambært Danmarks Radio.

Umframt lønarhækkan krevja teir 1500 flogskipararnir betri innlit í og størri ávirkan á arbeiðstíðirnar - serliga um vikuskifti.

SAS hevur avlýst  673 fráferðir í Skandinavia dag, eini 72.000 ferðafólk eru rakt av verkfallinum, harímillum eisini føroyingar.