Garnaskip og pør fiska lítið

Tvey garnaskip fiska svartkalva. Annað frystir fiskin, og hitt skipið ísar fiskin. Eitt garnaskip fiskar havtasku. 

Men fiskaríið er smáligt, sigur Fiskamarknaðurin í meting sínari um hesa vikuna.

Flestu partrolararnir eru til fiskarí nú í vikuni. Teir hava eisini smáligt fiskarí, sigur Fiskamarknaðurin. Trý pør fiska gulllaks.

Fimm línuskip eru undir Føroyum. Eitt línuskip er undir Íslandi og eitt við Eysturgrønland. Tvey frystilínuskip eru við Ísland og tvey við Eysturgrønland.

Trolarar og trolbátar

Tríggir djúpvatnstrolarar eru úti. Ein fiskar stinglaks og blálongu, og hinir báðir fiska svartkalva og kongafisk. 

Trolbátarnir eru á landleiðini og fiska tosk og flatfisk. Harafturat eru tveir trolbátar norðanfyri og fiska tosk og hýsu, men teir hava smáligt fiskarí har. 

Um útróður sigur Fiskamarknaðurin, at streymurin er harður hesa vikuna. Men veðrið verður hampuligt, so helst rør onkur út. Útróðrarbátarnir fáa mest tosk og hýsu og nakað av hvítingi.