Vil hoyra hvussu vindmyllur ávirka umhvørvið

Umhvørvisstovan hevur biðið um viðmerkingar um, hvussu vindmyllurnar hjá smápartafelagnum Vindrøkt vestan fyri Gellingarklett í Hoyvíkshaganum fara at ávirka umhvørvið.

Vindrøkt ætlar at seta seks vindmyllur upp vestan fyri Gellingarklett.

Myllutornini eru góðar 78 metrar høg, og við veingjunum er hæddin slakar 120 metur. 

Myllurnar kunnu gera streym, tá vindferðin er millum 2,5 metrar um sekundið og 34 m/s. 

Lógin krevur

Elveitingarlógin sigur, at felag, sum ætlar at gera streym, skal gera eina umhvørvisárinsmeting, sum Umhvørvisstovan skal góðkenna.

Árinsmetingin viðger árin á umhvørvið, plantur og djór, og mett verður um skuggakast og óljóð frá vindmyllulundini.

Almenningurin, áhugafeløg og myndugleikar kunnu gera viðmerkingar um umhvørvisárinsmetingina.

Freistin er til 15.august.