Konservativu velja nýggjan leiðara í dag

Atkvøðugreiðslan millum limirnar í Konservativa flokkinum um, hvør skal verða nýggjur formaður endar nevniliga í dag. Klokkan fimm seinnapartin verður væntað, at úrslitið er klárt. 

Greitt er longu nú, at tað verður antin Jeremy Hunt ella Boris Johnson, sum tekur við eftir Theresu May, sum legði frá sær, tá tað ikki eydnaðist henni at finna semju um Brexit. 

Hóast atkvøðugreiðslan endar í dag, so verður úrslitið tó ikki almannakunngjørt beinanvegin. Vinnarin av valinum verður kunngjørdur í morgin, skrivar tíðindastovan Ritzau.

Umleið 160.000 flokslimir í Konservativa flokkinum í Stórabretlandi hava atkvøðurætt. Sambært veljarakanningum fer Boris Johnson at vinna valið í dag.