Grønland fleiri pengar úr Danmark enn úr Grønlandi

Uppskot um fíggjarlóg fyri 2020 í Grønlandi er gjørt. Sambært tí verður heildarveitingin úr Danmark tríggjar milliardir og 911 milliónir krónur næsta ár.

Landsstýrið fær tríggjar milliardir og 204 milliónir í skatti og avgjøldum. Munurin er 707 milliónir krónur. Harafturat hevur landstingið álagt landsstýrinum at biðja Danmark um hjálp til almannamálini í Grønlandi.

Í uppskotinum hjá landsstýrinum verða 6,6 milliónir krónur í vinningi í grønlendsku fíggjarlógini næsta ár. Í Grønlandi er sama gongd sum í Føroyum. Fólkapensjónistarnir gerast fleiri og færri fólk arbeiða.

Færri skulu uppihalda fleiri, rætt og slætt

Yvirskipað er endamálið við uppskotinum um fíggjarlóg í Grønlandi í 2020 at fáa fleiri í arbeiði, sleppa av við fløskuhálsarnar í útbúgvingarskipanini og minka sosialu trupulleikarnar.

Okkurt óvanligt uppskot er. Millum annað ætlar landsstýrið at geva kommunum færri pengar, um úrslitini eru ikki nóg góð í fólkaskúlanum.   

Heilsuverkið kostar nógv, eisini í Grønlandi, millum annað viðgerðir í øðrum londum. Landsstýrið boðar frá, at sum frá líður verður væntandi neyðugt at strika onkrar viðgerðir, men hvørjar, tær eru, sigur landsstýrið tó ikki.