25 ár síðan Estonia sakk

Tíðliga um morgunin, tann 28. september í 1994, var Estonia á veg til Stockholm úr Tallinn í Estlandi. Tað var ringt veður og sambært kanningum hava aldur rivið bóvportrið frammi á skipinum leyst ella heilt av.

Sjógvur skolaði inn á dekkið og skipið sakk. Tað gekk sera skjótt fyri seg. Eftir at sjógvur byrjaði at skola inn á dekkið, gekk ein tími inntil ferjan sakk.

989 ferðafólk og starvsfólk vórðu við skipinum. 852 lótu lív.

Minnigarhald var hildið í Svøríki í dag. Ein av røðarunum var forsætisráðharrin Stefan Løfven. Millum annað segði hann, at vanlukkan skakaði alt landið.

Tað eru framvegis ivamál um júst hvat hendir tá Estonia sakk. Ein av teimum 137 fólkunum, sum kom frá vanlukkuni við lívinum, er Kent Harstedt. Hann talaði eisini á minningarhaldinum og bað um eina nýggja altjóða kanning, fyri at staðfesta júst hvat hendi. Staðfestast kann nú, at Estonia fór úr Tallinn, hóast hon í veruleikanum ikki var skikkað til sigling. Vit mugu avgreiða ivamálini, segði hann.