Norðmenn útfluttu fisk fyri 107 mia. kr. í fjør

Noreg útflutti 2,7 milliónir tons av fiskavørum í fjør fyri 107,3 milliardir norskar krónur, og tað var samstundis fyrstu ferð, at landið útflutti fyri meir enn 100 milliardir kr.

Í nøgd minkaði útflutningurin 3 prosentstig, samstundis sum virðið vaks við 8 prosentstigum.

Laksur var nógv størsta vøran, 1,1 milliónir tons, fyri 72,5 milliardir kr.

Av øðrum fiskasløgum var toskur størsti parturin, 181.000 tons fyri 10,1 milliardir kr. Nøgdin av toski minkaði, men prísurin setti met.

Pólland keypir mest av fiskavørum úr Noreg, 230.000 tons, fyri 10,6 milliardir kr.

Útflutningurin av fiski til Kina vaks eisini nógv, vøksturin var 1,5 milliardir kr, upp í 5,2 milliardir kr, skrivar NTB.