Leggur frá sær - hevur havt samband við tannáring

Skotski fíggjarmálaráðharrin, Derek Mackay, leggur frá sær, eftir at hann er lagdur undir at hava sent hundraðtals boð til ein 16 ára gamlan drong á sosialum miðlum. 

Sambært blaðnum, The Scottish Sun, skal Mackay hava havt samband við tannáringin í hálvt ár, og hevur umrøtt hann sum snotiligan.

Fíggjarmálaráðharrin skal hava sent dronginum tilsamans 270 boð á Instagram og Facebook, skrivar The Scottish Sun.

Mackay játtar, at hann hevur borið seg skeivt at, og tekur avleiðingarnar av tí. Hann hevur biðið drongin og familju hansara um umbering, skrivar BBC.

Skuldi leggja fíggjarlóg fram

Ráðharrin leggur frá sær bara fáar tímar fyri, at hann í dag skal leggja fram fíggjarlógina fyri næsta ár.

Skotski forsætisráðharrin, Nicola Sturgeon, sigur, at hon tekur avgerðina hjá Mackay til eftirtektar.

Tað er mamma 16 ára gamla drongin, sum hevur biðið um, at Mackay skal missa ráðharrasessin. 

Mackay tók við sum fíggjarmálaráðharri í mai 2016.