64.000 tons bíða eftir løgtinginum

Eingi útlit eru fyri, at broytingar, sum skulu gerast í fiskivinnulóggávuni, kunnu latast løgtinginum fyri páskir, sum ætlað.

Jón Brian Hvidtfeldt

30.03.2020 - 19:40

Lógin um sjófeingi skal broytast, soleiðis at uppsjóvarkvotur til vinnuligar royndir og verkætlanir kunnu latast samanlagt í fimm ár - og ikki trý ár, sum galdandi lóg loyvir. Harumframt skal landsstýrismaðurin fáa heimild til at gera hesar royndarkvotur til varandi kvotur.

Reiðarí, sum í dag eiga meira enn fimm prosent av uppsjóvarkvotunum, skulu ikki fáa burturav kvotunum til vinnuligar royndir og verkætlanir.

Tá broytingarnar eru samtyktar í løgtinginum, verður kunngerðin at søkja eftir hesum kvotum lýst.

Tilsamans er talan um 64.000 tons av uppsjóvarfiski - 10.000 tons av makreli, 14.000 tons av norðhavssild og 40.000 tons av svartkjafti.

Eftir ætlan skuldi broytingin í lógini um sjófeingi berast í løgtingið fyrr í mars mánað - saman við eini serskattalóggávu, sum ásetir skattin, tá veiðiloyvi skulu endaliga avhendast.

Men hvørgin er enn borin í løgtingið - sum ikki fær arbeitt fyri korona-smittuni - hóast eini 80 mál liggja í tinginum og bíða eftir at vera avgreidd.

Jacob Vestergaard, landsstýrismaður í fiskivinnumálum, veit í dag ikki at siga, nær broytingarnar koma í gildi, soleiðis at reiðarí kunnu søkja um uppsjóvarkvotur til vinnuligar royndir og verkætlanir.