Vænta 19 milliónir í halli

Samtakið Gist og Vist, sum hevði 12 milliónir krónur í vinningi í fjør, fer við hetta lag at hava slakar 19 milliónir krónur í halli í ár.

Tað sigur stjórin, Johannes Jensen, í brævi til Vinnunevndina hjá løgtinginum. Hann mælir til, at studningurin í hjálparpakka tvey, verður latin hvørjum rakstrarstað og ikki bara til sjálvt samtakið.

Gist og Vist hevur nógv rakstrarstøð, matstovur og gistingarhús. Umsetningurin hjá samtakinum er farin úr 15 milliónum um mánaðin niður í 1,3 milliónir krónur um mánaðin.

Hava mist 4.461 gistingarsnætur

Tá eru við inntøkurnar fyri fólk, sum eru í sóttarhaldi á hotellum hjá Gist og Vist. Føstu útreiðslurnar eru tær somu, 3,5 milliónir krónur um mánaðin.

Av teimum 209 starvsfólkunum eru bara 19 eftir. Johannes Jensen sigur eisini, at frá 17. mars til 31. mars misti Gist og Vist 4.461 gistingarsnætur.

Heitt verður á løgtingið um at tillaga hjálparpakka tvey, so hann eisini kann brúkast til Gist og Vist, soleiðis at hvørt rakstrarstað fær stuðul.