Færri við blóðflokki 0 gerast álvarsliga sjúk

Granskarar í fleiri londum, millum annað í Noregi, hava kannað blóðroyndir frá nærum 2.000 koronusjúklingum í Italia og Spania.

Ein av týdningarmiklastu finningunum, sum greiningarnar vístu, er, at færri álvarsliga sjúk fólk høvdu blóðflokk 0. Tað skrivar norska kringvarpið, NRK.

Fyrsta kanningin í heiminum

– Tað er ein verja, at hava blóðflokk 0, sum sigur, at tú hevur 30 prosent minni møguleika fyri at gerast álvarsliga sjúkur, um tú hevur blóðflokk 0, sigur Johannes Hov, sum hevur skrivað frágreiðingina.

Kanningin er hin fyrsta í heiminum, sum avdúkar tvær arvaeindir, sum elva til álvarsligu lungnasjúkuna hjá sjúklingum við koronu, skrivar lærdi háskúlin í Oslo í tíðindaskrivi.

– Hetta er sera, sera stórt. Finningin av hesum báðum arvaeindunum varpar óvæntað ljós á, hvussu álvarslig lungnasjúka í Covid-19-smittu kann íkoma og menna seg hjá nøkrum sjúklingum, sigur Tor Hemming Karlsen, granskari.