Autismuheim boðið út aftur

Heimið til børn og ung við autismu er nú boðið út aftur. Ætlanin er, at farast skal undir byggingina í vár. Heimið skal vera klárt at flyta í seinast í 2022, sigur Almannamálaráðið.

Bjóðast kann upp á sjey fakarbeiðstøkur.  Verkætlanin varð boðin út í fjør. Men tilboðini vóru nógv størri enn kostnaðarmetingin, so landsstýriskvinnan í almannamálum, Elsebeth Mercedis Gunnleygsdóttir, gjørdi av einki tilboð at taka.

Heimið í Kvíggjartúni á Argjum var tá mett at kosta góðar 42 milliónir krónur. Men lægsta tilboðið var 56 milliónir krónur. Sparingar eru gjørdar.

Heimið er vorðið minni og einfaldari, og heimið verður nú í einari hædd. Men líka nógv pláss vera í tí sum í upprunaliga uppskotinum. Freistin at bjóða er til 18. januar.