Kvotur fluttar

22.600 tons av makreli, sum skuldu fiskast í ár, verða flutt til næsta ár. Tað mælir Fiskimálaráðið til í lógaruppskoti, sum kom í tingið í gjár.

22.600 tons eru nógv meira enn tey tíggju prosentini av kvotuni, sum sambært galdandi lóg kunnu flytast til næsta ár.

Felagið Nótaskip, Reiðarafelagið og Fiskivinnuráðið heittu á landsstýrismannin um at flyta alla ófiskaðu makrelkvotuna frá 2020 til 2021. 

Svartkjaftur eisini uppií

Kvoturnar, sum skuldu latast til vinnuligar royndir og verkætlanir í ár, skulu eisini flytast til næsta ár. Og tá kemur svartkjaftur eisini uppí.

Møguligt verður eisini søkja um kvotu í sambandi við ítøkiligt fiskifarskeyp, uttan at seta fiskifarinum treyt um veiðiloyvi, soleiðis, at nýggir reiðarar við egnu fiskiførum kunnu fáa fiskirættindi, sigur Fiskimálaráðið.

Lógaruppskotið loyvir eisini teimum, sum hava fýra ára menningarkvotur og ískoytiskvotur, at flyta tað, sum ikki er fiskað í ár, til næsta ár.