Yvirtaka ikki farsóttarlógina

– Ongar ætlanir eru um at yvirtaka farsóttarlógina.

Tað sigur Bárður á Steig Nielsen, løgmaður, nú Jákup Mikkelsen, tingmaður hjá Fólkaflokkinum, heitir á landsstýrið um at yvirtaka farsóttarlógina.

Jákup Mikkelsen heldur, at tað er neyðugt við heimild at krevja av fólki, at tey fara í sóttarhald, tá tey koma til landið, nú sera smittandi útgávur av COVID-19 breiða seg aðrastaðni í heiminum.

Men landsstýrið hevur hvørki ætlanir um at krevja at fólk fara í sóttarhald við lógarheimild ella at yvirtaka farsóttarlógina, sigur løgmaður.