Aksel fer í uttanlandsnevndina

Aksel V. Johannesen verður nú fastur limur í uttanlandsnevndini, og Jóhannis Joensen verður fastur limur í landsstýrismálanevndini.

Aksel V. Johannesen fer úr trivnaðarnevndini, og í hansara stað kemur Eyðgunn Samuelsen, sum er komin í tingið fyri Heðin Mortensen, ið er farin í farloyvi.

Tað var úrslitið av nevndarvalinum í tinginum fyri løtu síðani.

Heðin Mortensen var limur í uttanlandsnevndini og landsstýrismálanevndini.

Neyðugt at velja av nýggjum

Men neyðugt var at velja tingnevndirnar av nýggjum, tí tað ber ikki til at skifta nevndarlimir í uttanlandsnevndini og landsstýrismálanevndini í ótíð. Og varafólk, sum tekur sæti á tingi fyri tingfólk í farloyvi, kann ikki taka við sessunum í uttanlandsnevndini og landsstýrismálanevndini. 

Valbólkurin hjá Javnaðarflokkinum, Framsókn og Tjóðveldi skeyt upp at gera hesar broytingarnar, og tað varð einmælt samtykt.

Allar hinar nevndirnar eru óbroyttar.

Heðin Mortensen var eisini annar næstformaður í tinginum. Eyðgunn Samulsen er farin í tann sessin.